JEUX A VENDRE

---

Je vous vens la rose de may.
- Oncques en ma vie n'amay
Autant dame ne damoiselle
Que je fais vous, gente pucelle,
Si me retenez a ami,
Car tout avez le cuer de mi.
 

Je vous vens la violete
- De joye mon cuer volets,
Quant je voy vostre doulz vis
Sur tous bel a mon avis.
 

Je vous vens la madoleine.
- Je tiens la dame a vilaine,
Se amant rnercy lui crie
Et humblement la deprie,
De repondre durement
Et lui mettre a sus qu'il ment.
 

Je vous vens la fueille de houx.
- J'ay bel ami plaisant et doulx;
Dieu veuille qu'aussi bon soit-il
Comme il est bel, jeune et gentil.
 

Je vous vens la rose d'Artois.
- Amez honneur, soiez courtois,
Bien servez en toute saison,
Et des biens arez a foison.
 

Je vous vens du rosier la branche.
- Oncques neige ne fu plus blanche,
Ne rose en may plus coulourée
Qu'est la beauté fine esmerée
De celle en qui entièrement
Me suis donné tout ligement.

---

Chrisine de Pisan